Basler Fasnacht 2021

Der Morgenstreich hat stattgefunden, zwar nicht so wie einst, aber einige Fasnächtler haben sich etwas einfallen lassen. Man brauchte nur das Fenster zu öffnen, dann hat man bis weit an die Stadtgrenzen den Morgenstreich gehört. 
Das eindrückliche Video der Sans-Gêne. Sie haben sich alle allein beim Pfeiffen oder Trommeln des Morgenstreichs gefilmt und dann dieses Vdeo produziert. So könnt ihr den Morgenstreich doch noch geniessen.

.
 

E paar Schnitzelbängg (Es isch e guete Joorgang )

Me waiss, e soo-ne Lockdown ka aim d Stimmig arg vermyyse
Är könnt aim aber au e Wääg us mänger Kryyse wyyse
Wenn d Rächnig vo de Stüüre kunnt hilf ych mir us dr Patsche
Statt zaale due-n-i uff em Balkon fünf Minute klatsche.

S Comité het das Joor mitre Prachtsblaggedde glänzt
E Schnitzelbänggler und e Pfyffer und no ain, wo schränzt,
das alles uffre WC-Rolle – öppis stöört mi dra.
Sträng gno miesstis doch do druff e Schissdräggziigli ha.

Dreydaagsfliege

Mi dunkts, dä chäibe Virus isch wirklig schampar gscheit.
Uf dr ganze Wält sy alli uf dä Chääfer yynegheit.
Mir Schwyzer, miir sy schlauer, mr wäärde wältwyt drum beniide.
Bi eus, do isch dä Virus vo Kanton zu Kanton verschiide.


Jetzt mache sy z Baasel d Bäize zue. S Baaselbiet blybt offe.
Anschyynend häit diir z Baasel ohni Abstand gsoffe.
Miir Baaselbieter syy halt braav. Miir syy mit eus im Reine.
Miir sy dehäi, und wär nid folgt, dä schicke miir in d Steine.

Y kenn e Chind, wo Sydney häisst. Paris häisst sy Schweschter.
Dasch, wel me die döört gmacht het, erkläärt mr s Groosi geschter.
Wäisch Heiri, die mache hüt wäg jeedem Räisli grad e Gschyss.
In Gälterchinde git s e Buschi, daas häisst Homeoffice.

Heiri (aus Buckten BL)
Baslers liebster Baselbieter)


Dr Ali Ibrahyym uss Buus
isch wäg de Vyyre ganz konfuus:
Im Kindsgi daarf uff äi Mool dää
em Frooläin Gyysi d Hand nümm gää.

Y schryyb uff Bäärn e Brief, e schaarfe:
Bersee! Masgge? Daas häisst Laarve!
Und zwäitens, spinnts euch nöimeduure:
E Laarve, die isch frei um d Schnuure.

D CVP säit: „Bitti, bitti,
bitti saaged uns jetzt d Mitti!
Miir sinn gaar nümm soo fescht kadoolisch,
byychte numme no symboolisch.“
„Yych haa vyyl lieber“, mäint dr Pfischter,
„Pharisääer statt Philischter.“
Dr Darbellay dritt in Aggzioon:
Spiilt Sündepfuul in Babyloon.
„Mir döörfe jetzt jo, drotz Verschbräche,
nach Luscht und Luune ehebräche.“
Fertig Mooses und Korinther;
grischtlig, lägg duu miir am Hinter.
Ych dängg im Stille so füür mii:
Soo isch es doch scho voorhäär gsii!

Spitzbueb

Die Schnitzelbängge kann man auch online geniessen. Das zweite Jahr in Folge. Diesmal haben sie bei der Produktion "künstliches" Lachen am Ende der Schnitzelbängge eingefügt. Das tönt doch schon besser als beim letzten Mal. Die Interaktion mit dem Publikum fehlt den Schnitzelbängglern sicher!

Hoffentlich gibts nächstes Jahr wieder eine Fasnacht und nicht wieder eine Fasnicht! 

Schnitzelbängg SRF in Zusammenarbeit mit Telebasel www.srf.ch/news/schweiz/basler-fasnacht-...-versen-gegen-corona
 

Und do no e Hampfle Schnitzelbängg

Ain stoot im Lade ohni Masgge do
und hett derfir e Zämmeschyss bikoh
i bi in ere Gugge, sait är knapp
do ziehsch nach finf Minute d Larve ab.

Dipflischysser


E Rekrut leert disjoor s Ziile
Durch s Online-Egoshooter-Spiile.
S Stramm-Stoo iebt är, jedi Wett,
Dehei nur im – statt vor em Bett!

D Emigrante


Hänn Si ghöört? Jetzt kunnt denn s Grundrächt für Primaate.
Jo, d Orang-Utan griege Gschiirschpiel-Automaate.
Kreeftig spaare könntsch im Unischpittel oobe
wenn d’Schimpansen aastellsch, anstatt düüri Schwoobe.

So, jetzt luege Sy emol my Nääsli im Profyyl:
majesteetisch, foormvolländet und grazyyl.
Si, bim Teschte im Laboor Rothen sait dää Fleegel:
«Do längt e Stääbli nit – y hool e Drummelschleegel.»

Rollaator Röösli



Z’Basel isch s’Bättelverbott (no) uffghobe – das find ych guet,
und wie ihr mergget, han ych, über dr Larve, e grosse Huet.
Dä gib ych nochhär umme und wär mir meh als e Finfliber git,
dä oder die fiehr ych denn haime – ych nimm se im Rolls-Royce mit.

Ych bi neu kantonale Primate-Beuffdraite – ouh, hän die Freud im Zolli,
ych tritt fir d’Rächt vo däne Tierli yy und ha d’Verantwortig – die volli!
Jetzt hett dr Grossroot zuesätzlich – ych ha’s grad geschter de Affe verzellt,
mir au no grad d’BVB-Verwaltig und dr Eric Weber unterstellt.

Schnapsbagge



My Frau, die het momentan – es isch wirgglig allerhand –
wägeme Sturz der rächti Arm imene digge Gipsverband!
Si isch kirzlig in der Freye-Strooss im heggschte Booge
bim Uswyche ume Bättler iber dr näggscht Bättler gfloge.

S Kuchi-Daaberettli



Das Fääle vo dr General-Sutter-Statue – schön und glänzig,
das macht e mänggy Duube duubedänzig,
die aint oder ander empfindet sogar Groll,
will sie nümm waiss, wo sie ihry Notdurft verrichte soll.

Si hän halt ans Guete im Lauber glaubt
Und däm Ur-Urlauber Lauber dr Urlaub erlaubt
Indäm är Ferie macht amene schöne Strand
Reduziert är dr Schade am Vaterland

Fäärimaa