Fasnacht 2016

Witeri Schnitzelbängg:

Dä Rochedurm z Basel isch am greeschte
Mit em glainere mien sich d Zircher dreeschte
Nur mien sy dr Fruscht nid iiberdryybe
Die greeschti Schnuure wird ene blyybe.

D'Clochard

Was het die WHO ächt gmeint, was d Wirscht ungniessbar macht?
Es het statt Fleisch z vyl Hirni drin - das isch unsere Verdacht.
Doch mergget Ihr, wenn mir der Köppel Eych als Byspiel gän,
ass Wirscht au kenne schädlig syy, wo z weeni Hirni hän!

D'Stroofrichter

Grexit, Konkurs vo Griecheland
Blexit, Konkurs vo Baselland
nur ka me sage die arme Grieche
sinn wenigschtens no glatti Sieche,

Dipflischysser

Morin Guy het ys verzellt
är heeri uff, d Waiche sin gstellt
fir das wo är no mache will. Jä Guy waisch du denn nid,
dass es uf eme Abschtellglais, gar keine Waiche git.

Peperoni

Danke für die herrlichen Schnitzelbänke Feschtbrueder

Davon, Feschtbrueder, möchte man gerne noch mehr haben

Ihr werdet es nicht glauben, aber ich lese sie auch gerne. Es bitzli kumm i schoo druus
Bei uns gibt es ja auch Bänkelsänger, in Bayern ganz spezielle - man nennt sie "Gstanzl", also die gesungenen Verse, nicht die Sänger

No ne Hampfle Schnitzelbängg

S'hänn d’ Wahle zeigt, dass Basel wirgglig anders tiggt,
het me in Nationalroot d’Sibel Arslan gschiggt.
E typisch Basler Gschlächt, e Name us em Daig.
wo in dr Stadt e ganz grosse Yyfluss heig.
Dass das e Basler Name isch, erstuunt uns vier do nit:
Was maine Sie, worum's doo z Basel «SIBELe-Waäje» git.

S Bangg-Ghaimnis


D Bundesrootswaal isch barat.
Und alles hofft uf e Sprängkandidat.
Doch es duet keine gee,
will dä hoggt no z Winterthur in dr Moschee,

Käller-Assle


Die Poller ufem Spaalebärg hän au symbolisch Gwicht,
will deert d Regierig exemplarisch zeigt: "Mir mache dicht."
Per Knopfdrugg kasch die abeloo- s wär scheen so mien mir dängge,
me könnt in dr Regierig so die greeschte Pfeel versängge.

D'Stroofrichter


Völkerwanderig und d' Bolizei duet d’ Gränze kontrolliere
Menschemasse pilgere - die ganzi Sach kennt eskaliere
Vom andre Land verspräche si sich Wohlstand, sueche s'Seelehail
Das sin im 8er unsri Wirtschaftsflüchtling uff em Wääg nach Weil,

Die Gsalzene

D'Fasnecht isch zwar umme, aber Schnitzelbängg ka me immer gniesse.

Sie – sid die glai Martullo Blocher
in Nazionalroot zooge isch.
Het die greftig afo schreie
und haut au mächtig uff e Disch.
Mache si sich nur kaini Soorge
drifft si au nit dr richtig Doon.
Jä das Verhalte isch ganz loogisch
denn wie dr Babbe so dr Soon.

Mac Väärs's


Hänn Sii der neyschti Bond scho gseh?
Also: Syni Frauen alteren als wie meh.
Wenn s so wyter goht, no ahni dumpf,
Haisst s näggschti Bond-Girl Widmer-Schlumpf.

Anggeweggemaitli


Aaglaag, Dementi, Ergläärigsnoot,
Do dängg i grad au an e Regierigsroot.
Los, Baschi, bi der FIFA wurd s Der gfalle,
Die hänn alli Kepf wie Schuttiballe.

Anggeweggemaitli


Apropoo Kopf und Schuttiballe:
D Martullo-Blocher duet mer gfalle.
Nur sottsch ere, wenn si will änglisch iebe,
E baar Läggerli in d Schnuure schiebe.

Anggeweggemaitli


Dangg singe uff eme Video
hett d SVP me Lyt bikoh
Friehner, wär sich erinnere ka
hänn d Rattefänger Flöte gha

Dipflischysser


Dr Mörgeli sait zum Fehr "Du loos,
jetzt schteen mr baidi uff dr Schtroos.
Darf ych bi diir, das wuurd mr nutze,
all Wuche schwarz ko d'Woonig butze?"

Dr Spitzbueb


Bapyyrlischwyzer syyge minder.
Ächt Schwyzer sin erscht iiri Kinder.
Wär liegt wie druggt, wär zwängt und droht,
Dä griegt e zwaite Bundesroot.

Bâlsagg 2016


3+ zaigt uns dä Bachelor,
Dä Macho Fudi-Tätscheler.
Wenn'd dänggsch, das Niveau sänggsch nüm meh,
Denn sotsch mol Teleblocher gseh.

Bâlsagg 2016


Jä Sii, dä Herr Guy Parmelin
isch fir dr Bundesroot bestimmt e Gwinn.
Als Räbbuur het dä, s muess so sii,
jederzyt e guete Wyy drbyy.
Villicht sett me ihn denn no beleehre:
Gang joo nie bim Ogi go Änglisch lehre!

Giftspritzi


I due jetzt syt de Bundesroots-Waale,
myni Bundes-Styyre nimme zaale.
S isch nid beese Wille, au kai Fruscht,
äxgyysi, Herr Muurer, i haa kai Luscht.

Bildsteerig