Fasnacht 2016

Au sportlich isch ar Fasnecht einiges los gsi.

Si schutte wie die Grosse, numme s Spiilfäld isch lyycht z glai,
Und wääge-n-iire Ränze sinn si langsam uff de Bai,
Si flueche vor sich aane und dä Diggsagg deert schnuuft schwäär,
Im Gfängnishof lauft s Grimpeli vo de FIFA-Funktionäär!

PereFyss


Gnabb 7 Kischte Schmiirgäld d'Fuessball-WM duet fascht nyt me koschte
Mir drei hänn zämmgleggd und mechte uns jetz au so aini boschte
Doch als alti Speggulante dien mir waarte, bhalte d' Rue
Will im Uusverkauf gäb's schyynt's no d' EM koschteloos drzue

Die Gsalzene


Au im gmischte Doppel isch dr Federer e Crägg.
Das schläggt noch zweimoll Zwilling au bestimmt kei Geiss ewägg.
Fir Rio winscht ihm d'Mirka Gligg "loss es richtig krache!"
"Nur sottsch denn mit der Hingis jo kei Doppelfähler mache!"

D Stroofrichter


Wäg Schneemangel hänn d Schwyzer Skifaarer do
vom Gipfel zem Taal abe z Fuess miesse go.
Im Dorf unde luegt denn ain ganz komisch dri
und maint, so schnäll sige die no nie dunde gsi.

Wyybuure


S'Skikader vo de Männer isch e ganz e druurige Huffe.
Die müen also jede Daag litterwiis Ovi suufe.
Mir hän versuecht däne z'hälfe und k'hofft s'wär besser gloffe.
Doch leider hän mir dr Marcel Hischer mit dr Drohne nid richtig troffe.

Bajass & Omega

Daß Ihr mit der Drohne nicht richtig getroffen habt, das wird auch Felix Neureuther sehr bedauern

Aber, aber!

2016 isch e guete Joohrgang gsi!

Bi uns dehäim, im Buurehoof
verdrrääiti Wält, miir findes doof
im Kuestall hämmer, kann i verroote
groossi Brobleem mit dr Männerquoote

Alperöösli


Y bi ammene Oobe döört am Rhyybord gstande
Und ha zwüsche Hochdütsch, Änglisch, Hochdütsch, Amerikanisch,
Änglisch plötzlich e baar Fätze Baseldütsch verstande.
Y ha dä gfrogt: Kunsch au us Basel? Häi-äi-äi!
Do säit dä: jee, dä Zuefall! Wie isch d Wält doch gläi.

Luuszäpfe


Völkerwanderig und d' Bolizei duet d' Gränze kontrolliere
Menschemasse pilgere die ganzi Sach kennt eskaliere
Vom andre Land verspräche si sich Woolstand, sueche s'Seelehail
Das sin im 8er unsri Wirtschaftsflichtling uff em Wääg nach Weil

Die Gsalzene


Ych glaub die Schwoobe hän do
Das Usmaass unterschetzt.
Hätt me doch gschiider sofort
Dem Asturm Gränze gsetzt.
S'wird gschobe, grapscht und drängelet,
in Masse stoot me a.
Es wänn halt alli Schwyzer,
die Mehrwärtstyyr erstattet ha!

Hansli Bargäld


Wo d Terrorischte iber dr Zoll sinn zue n ys ghoo,
het me se gfroggt: Hänn iir au Waare mit eych doo.
E paar Kalaschnikov, isch d Antwort ussem Kaare.
Druff sait dr Zellner: Aha ghai Flaisch, iir kenned faare.

Giftnuudle


Im Dunggle schlyycht e dunggle Maa ans Boord sich aa.
Git aim si Gäld, damit är au uf s Beetli kaa.
Das schwanggt und gnirscht, doch är kunnt äänen a, gumpt drab.
"E scheenen Oobe", winscht dr Fäärimaa no gnapp.

Dootebainli

Unsery Wält isch grangg, soo gitts emol e Gnall
Flichtlingseländ und Terror iiberall
ai Liechtbligg gitts won ys Gliggseelyghait duet bringe
he dr Bo Katzmann heert jetz ändlig uff mit singe

Giftnuudle

Letscht Dezämber es hett im Fall no Blatz ghaa
bin y s Abschiidskonzärt go luege vom Bo Katzmaa
Y ha sy Autogramm verlangt nit, wil s e Gnuss isch
Nai, y ha s schriftlig welle, das jetzt ändlig Schluss isch

Rollaator Röösli


D WHO legt e Gsundheitsstudie uff e Disch
Dass s Wurschtässe worschnylig läbensgfährlich isch
Dorum bruucht me d Exit nümm, die chasch vergässe
Muesch eifach e dopplete Wurschtsalat ässe.

Doggter FMH

Politisch höchscht brisant isch si gsi, die Fasnecht 2016

Si, dr CEO vo dr Roche klaagt mir in einere Hyschtery
S hän alli Höheangscht im Turm – also Akrophobie
Ych hät dä Turm dr Regierig z Lieschtel gschänggt
Denn wär ihre Horizont nüm so beschränggt!

Ich glaub das Projekt wird schittere
Wo nüt isch chasch au nüt erwittere


Si, d Martullo Blocher het nit nur em Bappe sini Zeen
Nai au no sini Blattfiess, si Figur und sini SVP-Gen
Wo die im Bundeshuus schwört und so stramm anestoht
Bi n ich sicher, dass die dört uf‘s Pissoir got

Und wo si uf däm Pissoir denn will Wasser gäh
Stooht näbedra dr Parmelää

Doggter FMH


Zerscht wän si joo nit fusioniere,
Denn s’Gäld näh, ’s tuet si nit geniere.
Bald wänn die Rueche, wirsch es gseh
Als Bonus no dr FCB.


Mir fiere d’Frauequote y.
Doch d’Quote-Frau will kaini sy.
Die Kaderschtell bikunnt e Maa
Und mir feen wider vorne aa
Mir fiere d’Frauequote y....

Bâlesagg


Dr lieb Gott luegt uf d Aerde aabe, d Ängeli tien singe
aismool unterbricht er sy : Tiend mir e Färnglas bringe.
Er suecht und suecht, denn stöönt er uf: Nai bin ych e Depp,
dä isch nimm bi dr Fifa - nai - da spiilt dehai „Tschau Sepp!“

Blauäugige


Dr Blatter säit zum Platini:
"S isch nid mini Schuld es isch dini!"
Do mäint dr Platini zum Blatter:
"Du bisch für mi gsi wiene Vater:
An Schuld han i nummene fiini, und mini isch dini,
me haftet für sini Bambini - ciao Sepp!"

Brunzguttere

D Martullo-Blocher, wo dr Christoph uns zur Rettig schiggt
isch us em gliiche Holz wie äär, das hän miir schnäll erliggt.
Nuur wenn de gnauer aaneluegsch, so froggsch unwiderrueflig:
Was isch das für e Schriiner gsi, und waas macht dää ächt brueflig?


In Lieschtel hän si überlegt - Sii, das isch zum Stuune:
Au d Helfti an Kultuur läng an sich für e gueti Luune!

Brunzguttere


Wenn in Dytschland wider Flichtlingshaim dien brenne
und sich Nazis deerfe "bsorgti Biirger" nenne.
Denn sait d Pegida: "Uns kaa me fir d Bränd nit biesse.
Miir sinn nit dschuld, nur wil mir Eel in s Fyyr dien giesse."


Die Biirgerlige z Baselland sinn nit so gschiid.
Und luege si in d Stadt, wäärde si gääl vor Nyyd.
Eerg're sich grien und blau und lyyde Hellegwaale,
wil z Baasel schryybe beesi Rooti schwaarzi Zaale.


Iber dr Bunga-Berlusconi hänn mir glache.
D Oore vom Charles, was Sarkozy und Bruni mache.
Dr Hollande, wo per Deff sym Gspuusi Croissants bringt,
Nur ains isch phyynliger, dasch wenn dr Maurer singt.

Dootebainli


s‘fielt sich mängä in Basel nüm wool
findsch es uusgstorbe, langwyylig, hool
die autofrei Stadt macht di krank
es fäält hald aifach – der Lärm und dr Gstangg


än Asylant lütet aa uus dr Schwyz
und sait dänä dehaim: diend jetz loose:
sgoot de Mensche do gar nid so guet
mit dänä Löcher in ihre Hoose


Alls wie mee Gschäft in Basel göön zue
in dr Stadt findisch kuum mee Schue
mit lengere Öffnigszyte – so main i -
findsch aifach drei Stund lenger kaini

Dräggspatze


Amstutz Brunner Köppel Brand de Courten Rickli Frai-
singer Frehner Giezendanner Blocher Nummer zwai
Rösti Rutz Heer Föhn ins Hösli Aeb' und Aesch' und Mür'
Derby het d WHO doch gwarnt: z vyyl Würscht gänn Maagegschwür


E Stüürgschängg do, e Stüürgschängg dert, do isch dr Rammel stuur
will: spaare kaa me schliesslig bi dr Bildig und Kultuur
Drum ischs nid lätz jetz achtzig Millioone z inveschtiere
Sunscht mien mr die in zää Joor wiider alphabetisiere.


Die Bilder vo däm Menschestrom dien ain im Härze wee
Hunderti und Tausigi und dääglig wäärde s mee
Voller Sympatie und Mitlaid mien mr drüber brichte
Die arme, arme Schwizer wo in dütschi Lääde flüchte.

Dreydaagsfliege